![](http://akt-media.com/images/O/12022040.jpg)
ពេលនេះ ក្រុមនាយពែរមី ស្ថិតក្នុងចំណោមអ្នកកំប្លែងល្បីៗ ក្នុងស្រុក អាចប្រជែងជាមួយក្រុមនាយក្រឹម នាយកុយ បានទៀតផង សូម្បីតែកូនក្មេងតូចមួយ ក៏ ស្គាល់រូបគេដែរ...។
នាយពែរមី មានឈ្មោះដើមថា ចែម ចាន់តារា អាយុ៣២ឆ្នាំ ឪពុកឈ្មោះឡុង សារឹម អាយុជាង៥០ឆ្នាំ ម្តាយឈ្មោះស៊ឹម ស៊ីមាន អាយុជាង៤០ឆ្នាំ មានបងប្អូន ៧នាក់ (ប្រុស៥) ពែរមី ជាកូនច្បង មានស្រុកកំណើតនៅភូមិពពែ ឃុំពពែ ស្រុកស្វាយទាប ខេត្តស្វាយរៀង។
នាយពែរមី ត្រូវបានគេស្គាល់ច្បាស់ នៅ២ឆ្នាំចុងក្រោយនេះ តាមរយៈការលេង ឈុតកំប្លែងឱ្យទូរទស្សន៍ CTN ធ្វើឱ្យទស្សនិកជនបានផ្ទុះសំណើចគ្រប់ពេល តាមរយៈវោហារស័ព្ទជាអ្នកកំប្លែងមុខស្ងួត។
ជួបជាមួយនាយពែរមី កាលពីពេលថ្មីៗនេះ នៅស្ថានីយទូរទស្សន៍ CTN តារាកំប្លែងរូបនេះ បាននិយាយដោយ សប្បាយរីករាយ ពេលកេរ្តិ៍ឈ្មោះ កំពុងតែលោតស្ទុះឡើងបែបនេះ។
នាយពែរមី និយាយថា “ខ្ញុំមិនដែលគិតថា បានធ្វើជាអ្នកកំប្លែងល្បីឈ្មោះអីទេ កាលដាក់ពាក្យចូលប្រលង CTN ក្នុងកម្មវិធី “មហាកំប្លែង” ហ្នឹង គិតថាយ៉ាងម៉េច យ៉ាងណា បានធ្វើជាអ្នកកំប្លែង ឡើងទូរទស្សន៍ បានម្តងនឹងគេដែរ។ តែហេតុតែមាននិស្ស័យ ខ្ញុំក៏បានជាប់ជាជ័យលាភីក្នុងកម្មវិធីនោះ រួមទាំងសមាជិកមកពីក្រុមដទៃ ៧នាក់ទៀត មកច្របាច់ បញ្ចូលគ្នា ទើបបង្កើតបានជាក្រុមមួយសព្វថ្ងៃនេះ តែកាលប្រលងនោះ ខ្ញុំបានពិន្ទុល្អជាងគេ”។
នាយពែរមី បានហក់ចូលសិល្បៈកំប្លែង ដោយចៃដន្យ ព្រោះពីមុន គេធ្វើជាកម្មករសំណង់ ហើយក្រុមគ្រួសារ មិនមែនពូជពង្សជាអ្នកសិល្បៈ តែពេលនេះ នាយពែរមី បានបណ្តុះប្អូនប្រុសម្នាក់ ឱ្យចូលរួមអាជីពជាអ្នកកំប្លែង ក្នុងក្រុមដែរ។
នាយពែរមី បាននិយាយទៀតថា “ខ្ញុំធ្វើតែសំណង់ ស្ទើរមួយជីវិតទៅហើយ ថ្ងៃណាក៏ត្រូវកម្តៅថ្ងៃ ត្រូវខ្យល់ភ្លៀងដែរ ហើយឪពុកម្តាយខ្ញុំ មិនមែនជាអ្នកសិល្បៈទេ។ ខ្ញុំចេះកំប្លែងពីមុន ក៏អត់គ្រូដែរ ចេះតែនិយាយលេង ពេលផឹកស៊ី ជួបជុំមិត្តភក្តិ ឬញ៉ែស្រី និយាយលេងទៅ។ ឥឡូវក្រុមខ្ញុំលេង មានអ្នកនិពន្ធត្រឹមត្រូវ គឺលោក វ៉ិចទ័រ (Victor) ពួកខ្ញុំជាសមាជិក ចាំតែស្តាប់ និងធ្វើតាម គួបផ្សំនឹងទេពកោសល្យផងដែរ។ ពេលនេះ ក្រុមខ្ញុំមានសមាជិក៧នាក់ គឺនាយក្រូច នាយតោ នាយតាក់ស៊ី នាយតយ នាងអ៊ីត នាងខ្ញង់ និងប្អូនប្រុសខ្ញុំ ម្នាក់ទៀត ដែលខ្ញុំទើបបណ្តុះបណ្តាល គឺនាយគ្រឿន។ នៅក្នុងក្រុម ខ្ញុំជាប្រធានក្រុម ហើយពួកយើងបានសម្តែងដោយសាមគ្គី ចុះសម្រុងគ្នាល្អណាស់ ទើបអាចធ្វើបានល្អបែបនេះ”។
គេកត់សម្គាល់ឃើញថា ពេលនេះ សន្ទុះគាំទ្រពីមហាជន ទៅលើនាយពែរមី កំពុងតែខ្លាំក្លា ហើយតាមអ្នកជំនាញសិល្បៈថា ក្រុមនេះអាចប្រកួតប្រជែងជាមួយក្រុមខ្លាំងៗ ដូចជា ក្រុមនាយកុយ នាយក្រឹម... បានទៀតផង បើសិនជាគេមានរឿងកំប្លែងថ្មីៗ ប្លែកបែបនេះតទៅទៀត។
លោកចែម ចាន់តារា បានមានជំនឿចិត្តថា “ឥឡូវ ខ្ញុំសប្បាយចិត្តដែរ ព្រោះសូម្បីតែកូនក្មេងតូចៗ ក៏គេស្គាល់ក្រុមខ្ញុំ ពិសេស ពេលខ្ញុំទៅណា គេថា ពូ ឬអាពែរមី តែខ្ញុំមានអារម្មណ៍ថា រំភើបណាស់! តាមពិត ក្រុមខ្ញុំ ត្រូវបានមហាជនស្គាល់ តាំងពីខ្ញុំលេងរឿងកំប្លែងភាគ លើ CTN “ថាំងចេង ទៅចម្លងធម៌” ម៉្លេះ។ ហើយនៅឆ្នាំ២០១១ មានសន្ទុះខ្លាំងតែម្តង ដែលមិនមែនជាមោទនភាពអីទេ តែខ្ញុំដឹងតាមរយៈខ្ញុំលេងកំប្លែងកាត់សក់ ក្នុងមង្គលការគេ ឥឡូវពីចន្លោះខែវិច្ឆិកា-មេសា ខ្ញុំរវល់រហូត គ្មានពេលទំនេរឡើយ ថ្ងៃខ្លះ៣-៤រោង ក៏មានដែរ ហើយខ្ញុំកាត់សក់ ២នាក់ នាងខ្ញុង តម្លៃជិត១៨០ដុល្លារប៉ុណ្ណោះ។ ចំណែកសម្អាងការ ស៊ីថ្លៃ១.៥០០ដុល្លារ”។
កាលទើបមានឈ្មោះល្បីដំបូង នាយពែរមី បាននិយាយថា អាចរកប្រាក់ចំណូល បាន៥ពាន់ដុល្លារ ក្នុង១ខែ អ៊ីចឹងពេលឡើងកូដបែបនេះ ចំណូលក៏ទៅតាមហ្នឹងដែរ ពិសេស នៅរដូវក្តៅ ប្រាកដជាត្រូវប៉ាន់ មិនចាញ់តារាចម្រៀងល្បីៗប៉ុន្មានឡើយ។
នាយពែរមី បានប្រាប់ដោយរីករាយថា “ខ្ញុំមិនលាក់បាំងទេ ឥឡូវប្រាក់ចំណូល ពិតជាកើនមែន គឺជាមធ្យម អាចរកបានជិត១ម៉ឺនដុល្លារ ក្នុង១ខែ ឬអាចថា បើទាប ត្រឹម៧-៩ពាន់ដុល្លារ ក្នុង១ខែ តែកំណើននេះ ត្រូវប៉ាន់ តែរដូវក្តៅទេ”។
នេះជាតួលេខមួយខ្ពស់ បើប្រៀបធៀបទៅនឹងកាលនៅធ្វើសំណង់ ១ឆ្នាំ មិនបានស្មើនឹងលេងកំប្លែង ១ភ្លែតផង។
ទស្សនិកជនជាច្រើន និយាយថា តាមរយៈការសង្កេតឃើញកន្លងមក តារាកំប្លែងល្បី តែងតែមានប្រពន្ធច្រើន តែនាយពែរមី មិនទាន់មានរឿងអាស្រូវស្នេហាទេ ព្រោះតែនាយមានប្រពន្ធកូនទៅហើយ។
លោកចាន់តារា ហៅពែរមី បានរៀបរាប់ថា “ខ្ញុំបានរៀបការកាលពីឆ្នាំ២០០៨ ភរិយាខ្ញុំឈ្មោះជា សុឃីម អាយុ២៩ឆ្នាំ នៅខេត្តកណ្តាល។ ពេលនេះ បានកូន២នាក់ ហើយរស់ដោយសុភមង្គល”។
នាយពែរមី បន្ថែមថា “ទោះបីជាខ្ញុំគិតថា អាជីពកំប្លែងខ្ញុំជោគជ័យក្តី តែពេលខ្លះ ក៏បារម្ភដែរថា ខ្លាចតែនិយាយទៅមានការខុសឆ្គង នាំឱ្យបងប្អូន មិនសប្បាយចិត្ត ព្រោះជាកម្មវិធីផ្សាយផ្ទាល់ តែគោលបំណងរបស់យើងខ្ញុំ តែម៉្យាង គឺឱ្យបងប្អូនសប្បាយរីករាយ បំបាត់កង្វល់ផ្សេងៗប៉ុណ្ណោះ”។
ពេលនេះ ក្រុមនាយពែរមី កំពុងតែល្បីលើកញ្ចក់ទូរទស្សន៍ ជCTN ក្នុងកម្មវិធី “រាត្រីកម្សាន្ត”, “សំណើចតាមភូមិ” “សុខគា លក្ខិណា ប៊ីអាយជី” និង “ដំណឹងហួសចិត្ត”...៕